2012年7月31日 星期二

<為食豬介紹> : 高水準的心機中菜 - 皇仁書院舊生會

寶貝的生日飯,一眾忙爆嘅朋友當日先搵地方食飯… = =

很厲害嘅好友係OPENRICE搵到位於大坑的皇仁書院舊生會,更幸運的是,有人即日取消BOOKING,所以我地頂上了。(BOOKING嘅先生不停話我地好彩,平常即日BOOK係無可能的)


第一次唻到,門口已很有驚喜了,跟學校CANTEEN一樣。
然而,每道菜亦出乎意料之外的好吃。而且價錢以菜式來說唔算貴。

菜式不是我點的,不是所有菜名都對,請見諒。

第一道菜 - 桂花蜜餞炸蠔


碟未上,桂花味先至。
桂花茨汁甜而不澀,鋪滿肥美蠔身。清甜桂花配上炸蠔,估唔到係咁夾,桂花嘅清甜減去左炸蠔既"熱氣"。

蠔非常新鮮,隻隻蠔身飽滿、啖啖肉。蠔雖炸過,但唔油膩,蠔味亦很濃。
有朋友臨時唻唔到,我一連食左2隻。

第一道菜已令印象分大加,更加期待接下來嘅菜式。

第二道菜子薑花枝蚌仁炒鴿片


一上菜,已經俾伴碟嘅橙片同青瓜片嘅刀功所吸引。近年來已經好少見到仲有為整靚碟餸而切嘅伴碟。

花枝跟蚌仁炒得剛好,非常爽口。而第一次食炒鴿片,說真的我地都食唔出係咩,我地初時以為係牛、之後以為係豬潤,哈哈!不過味道不錯。

而且朱迪最最最愛食子薑,係夏天時令菜!子薑微辣,炒得脆口。

湯品杏汁肺湯


好耐無飲過嘅心機湯!整豬肺湯,功夫超級多,係出面已經唔係成日飲到了。

而呢度嘅杏汁白肺湯材料重份量。豬肺、白菜、豬骨跟雞腳十足。湯呈奶白色,帶點黃油。湯味濃郁,杏仁味尚可,不過濃一點會更好。近期家中欠湯水,飲多兩碗,滋潤非常。
豬肺煮得非常腍,我地食湯渣都食到飽左。

第三道菜鮑汁柚皮鵝掌


第一次食柚皮,係食鏞記嘅。之後已經食唔到好食嘅柚皮,一唻功夫多,二唻成本平,沒太多酒樓肯花心機整。就算有賣,亦未必好食。

皇仁嘅柚皮係食得第二好食的柚皮,柚皮炆得超腍又入味、無根,入口即融。柚皮用鮑汁扣、加上蝦子,雙重味道發放。而變成配角(^^)嘅鵝掌亦煮得非常腍,骨近乎甩出唻,膠質很重。壽星女大愛,食左好幾隻。唯一美中不足的是柚皮唔夠喉,大塊D會開心好多。

第四道菜椒鹽陳皮蝦

用上較大隻嘅海蝦,油泡過嘅蝦KEEP得到肉身彈牙,蝦殼炸得香脆可口。而且大廚非常細心,挑走蝦腸外,更連蝦鬚及蝦腳都剪走,絕對可以連殼食落肚~HAHA

用上椒鹽跟陳皮唻煮,第一次食用陳皮入饌嘅菜式,雖然平時唔食陳皮,但入口有陳皮嘅酸甜,倒也不錯。陳皮中和左椒鹽嘅咸辣,非常惹味。

第五道菜 清蒸海斑


我唔食魚嘅,所以淺嚐以已。海斑非常大條、份量十足,但肉質很滑,朋友們吃得津津有味。

第六道菜 炸子雞


生日飯當然要有炸子雞,此時我地已經非常飽了,但都人人2舊努力KO佢。炸子雞皮薄兼脆,而且雞肉嫩滑。絕非如一般外間酒樓般粗製濫造。平常朱迪會點椒鹽同喼汁,以去雪味,今次連椒鹽都無點,因為雞味已經十分夠了。

飯後甜點


西瓜配上話梅粉,聽得多,食倒還是第一次。原來加左話梅粉真係甜好多,食一片西瓜,消一消濟~

腰果露湯丸
平常好少食咩咩露,怕滿口粉。但呢度嘅腰果露卻唔會,相信係生磨嘅。
腰果露算係比較稀,腰果味很濃,口感亦很滑,唔算太甜。以飽餐一頓後來說,稀身反而更好,太稠反而會食唔落。配上芝麻湯丸,很飽,卻很滿足。

成餐飯都十分好吃,屬高水準之作。坊間已經好少有如此高水準嘅心機中菜了。
不靠裝潢,只靠食物水準及服務(員工是上一輩的,服務周到但心直口快,HAHA~或者有人會覺得笑容唔夠,但我地卻好受落。一式一樣都倒模service同呢度係唔夾既~)都可以晚晚爆場,亦keep得到水準。絕對真心佩服!!

實在非常感謝BABY暫時暫急搵到嘅呢間好吃飯堂呢!!

小貼士,想吃的話,記住要預早好多訂枱!!

~~~~~~~~~~~~~~~~~~~~~~~~~~~~~
朱迪
bluesky_judy@yahoo.com.hk
facebook.com/judytseZ
~~~~~~~~~~~~~~~~~~~~~~~~~~~~~


沒有留言:

張貼留言

★樂樂確診甲型流感★後感

近這2個星期有關甲型流感近乎是密集式公佈,更不幸的是聽到有幼兒因此過身。 雖然不認識對方,但依然非常心痛。 不幸地,樂樂在上星期確診甲型流感。 但幸運地,樂樂食了2天特敏福共4劑,就退燒了。 謝天謝地! 因醫生沒有解說過甲型流感的風險及特...