高質食物貼心服務★發哥粥底海鮮火鍋★

跟朋友到九龍灣傾嘢，接近晚飯時間，想搵飯食但德福商場比較多人，一search之下，搵到距離德福戲院腳程5分鐘的地方就動身出發。

發哥粥底海鮮火鍋隱身在工廈裏面，但裝修、環境都很乾淨，侍應們亦很有禮貌，坐得非常舒服。

剛坐下就每位送一款燉湯，今日飲嘅係花膠蟲草雞~落足料燉，滋陰補氣~

另外仲有前菜、冰鎮鮑魚同焗青口， 有heart之作，海鮮新鮮好味道。

他們主打粥底火鍋，我哋點咗海鮮火鍋，另外按人頭計點8款食物，每位每款食物有三件左右，點菜時以為會唔夠飽，但錯啦，我哋食到8成時已經飽到飛起。

呢度嘅粥底火鍋同平時食嘅唔一樣，先用粥水打邊爐最後先加米落去煮。

食物分批上，好新鮮，海鮮份量亦比想像中多， 仲有我好想食嘅卜卜蜆。

先落海鮮，讓粥水更鮮甜。
奄仔蟹、蝦、卜卜蜆、魚、 蟶子、貴妃蚌分批落，每款都好鮮甜新鮮，唔會因為係工廈食堂就hea你。

喺散叫嘅食物當中，我哋一致贊同肥牛非常好味， 肉質嫩滑，真係牛有牛味，唔會係平時嗰啲雪到硬繃繃、勁多肥膏嘅肥牛。

食到大約八成，我哋已經好飽啦， 慢慢食伙計們亦冇催我哋。到最後加粥底嘅時候，仲主動提出落少啲米，以免我哋過飽。

我哋最後係慢慢坐下、睇下電視，清埋揸任飲嘅竹蔗茅根水先離開。

冇辦法，太飽喇，下次再有機會嚟九龍灣，一定會返嚟再食。

發哥粥底海鮮火鍋
網址: https://s.openrice.com/QrbS0eoe900~uYvQHAA
地址: 九龍灣宏開道13號景發工業中心地下7-8號舖
電話: 31888192