請工人姐姐心路歷程分享

#請工人姐姐 #我手寫我心 #戴番頭盔先 #人人經歷不一樣 #參考下好啦

近月不少朋友都準備 #請姐姐，可能因為我請嘅前工人姐姐「中咗招」、而家姐姐又唔錯，所以交流下。

正所謂人心肉做，人家山長水遠唻打工、自己亦真金白銀請姐姐，#簽約前細心了解係比較穩陣👍

以下係小小心路歷程分享，希望幫到大家💪
1. 📅預留約3個月時間：簽約後菲姐姐約2個月到港、印姐姐約2.5個月。
2. 🤔考慮清楚想請菲或印：我前任姐姐係菲，請完一次後怕咗，現任姐姐係印。
3. 🤦‍♀️請姐姐前入fb groups 睇下有咩黑店agent、了解下請人嘅注意事項、個心打定底先。
4. ☝️搵d朋友用過既agent，成功配對率高D
5. ✋搵多幾間agents見多幾個姐姐：同一道理，自己搵工都唔會淨見一間。
6. 🎞一定要做video interview：唔係要知佢嘅答案，係睇佢嘅反應同態度。佢地即場有人提水😝，所以答咩唔重要，點答先最重要。我請姐姐時，最有印象係姐姐笑容好好。同埋睇下合唔合眼緣、個樣奸唔奸，CV張相係咪PS過嘅🤣
7. 👩年齡：純個人喜好，我偏好32-39歲。太後生我驚要教女、大過我又驚佢唔聽意見。我而家個印姐姐係37，有2個小朋友，湊小朋友經驗比我豐富👏👏
8. 👩如果請印姐姐的話，可考慮會「包頭」嘅姐姐，聽朋友講佢地有戴頭巾嘅姐姐人品幾純。我姐姐唻番工時無包頭，但佢ws張相有。
9. 📝CV上面寫既野，唔駛太信🤣 參考好啦
10. 🔴重點：#唔好心急、唔好心急、唔好心急

無論你嘅家庭環境點，總會有agent話你好難請，俾D信心同時間俾自己，一定會請到嘅。#所以唔好心急。

姐姐上班之後，花一Ｄ時間去教佢，等佢知道你自己嘅習慣，亦俾多D耐性，始終大家文化、生活習慣唔一樣。我果時用咗一個月時間教姐姐，然後就復工了。

亦分享下我前任姐姐嘅「中招經驗」：
前姐姐入職時35歲，為咗要我俾佢放假回鄉，話佢老公死左，係我面前喊到拆天。但佢CV上寫已離婚。回鄉一星期，睇佢fb係坐係一個男人嘅電單車尾，仲話放緊假。番唻一個月內就辭職，仲補番錢俾我。佢走左之後，我係TOILET個水桶入面搵到樽芥辣。組織下件事，就知道佢果時為左喊用芥辣搽眼，因為佢眼皮係紅哂，但無腫。約一個月後佢主動ws我祝濼濼生日快樂，多謝佢之餘亦8下佢張相，換咗張著住bikini係遊艇曬太陽嘅相🤷‍♀️再加上我收到3封財仔信話再唔還錢就淋油。從此，我就怕咗請菲👉👈

而現任姐姐都有蝦碌：
我confirm咗第一個，臨上機前放咗我飛機，又要再開始搵姐姐。現任姐姐係我第一輪搵姐姐時未出現的，CV上寫18年年尾係台灣完約。Video interview對答嘅態度好誠懇，我地用國語傾，中間佢有D位聽唔到，佢都好坦白笑住話我唔識聽🤣
結果姐姐唻到一個月後，我先知佢係08年係台灣打工🤣🤣🤣🤣🤣🤣
錯有錯著係，姐姐10年無做嘢，所以佢好用心做，亦用心學習。
而家唻咗半年，姐姐已經識少少廣東話。最搞笑係：濼濼跟咗佢講國語。
想像下：濼濼講古天樂式普通話、姐姐講金剛式廣東話🤣🤣🤣

📍#結論：無論幾小心都好，請到好姐姐嘅運氣都係佔8成。上面寫嘅要點都係為咗提高成功率，小心駛得萬年船。#人心肉做，你對姐姐好，姐姐都唔會對你太差。共勉之。

p.s. 圖文不符。張相係我個「唔鍾意影相嘅仔」，而每次姐姐影佢佢都開心笑，我就知道，姐姐好錫佢，佢亦好鍾意姐姐😊我好欣慰😚